ŚMIECH TO ZDROWIE

Alojzik dostoł roz na odpuście piekno trąbka. Trąbił na niej w doma, że wytrzymać nie szło. Naroz przylatuje, siado w kuchni na ryczce i pado:
- Mamulko, popatrzcie, nasz sąsiad podarowoł mi siekiera i spytoł mie, czych nie jest ciekawy co tam w tyj trąbce w środku siedzi.

- Kto to był Zachariasz? – pyto roz ksiądz dzieci.
- Jo wiem. To był kolejarz – pado jedyn synek.
- Kolejarz? Jak to?
- No, bo wczoraj farorz na ambonie pedzieli: „... a potem przyszła kolej na Zachariasza”.

Mały Karlik przyszedł z dworu wymaraszony i potargany. Matka zła, że znów trzeba cerować i prać, wlała mu solidnie. Synek płacze, a matce żal się zrobiło dziecka i powiada:
- Myślisz, że mnie nie boli jak cie bija?
- Nie, bo zadek jest mój!

Roz jedna kobieta jechała ze swym synkiem w pociągu. Ale on inaczej nie godoł ino gwarą. Ją to tocha raziło, że ludzie tak na niego patrzą, toteż chciała go nauczyć pięknie po polsku mówić. Naroz synek widzi ptoka i woło:
- Je, mamo, patrzcie, tam leci ptok!
- Nie ptok, ino ptak – pedziała matka.
Synek się zamyślił. Naroz patrzy i widzi srokę, nie wytrzymoł i woło:
- Je, mamo, tam sraka leci!

- Dzieci – pyto się rechtór w szkole – czy zrobił kto z wos jaki dobry uczynek?
- Jo, panie rechtór – odpowiedzioł synek i dźwignął palec.
- No to wstań i powiedz nam wszystkim, co to takiego było.
- No to było tak: Wczoraj się patrza, a idzie se tako staro babcia i pyto się mie, czy jeszcze daleko do dworca. To jo jej padom, że z pół godziny bydzie. A ona na to: „Jezderkusie, a jo mom za chwila pociąg do Gliwic”. No, to jo nic, ino prędko spuszczom Azora z łańcucha i poszczułech ją. I wiedzą, panie rechtór, że zdążyła?!

żartowała: Anna Bendkowska